के यू को कुना कुनामा विश्वकप

अमिर जोशी

विश्वकप फूटबल २०१० को रौनकमा नरमाउने सायदै कोही भेटिएला, अहिलेको माहोलमा । यसै पनि चार वर्षमा आउने यो महाउत्सव कसैका लागी रमाइलोको विषय बन्न पुगेको छ भने कतिका लागि राम्रो आमदानीको स्रोत ।
जहाँ गएपनि फूटबलले राम्रै स्थान पाएको छ । घरको कोठा, विद्यालयको बस, कक्षाकोठा, भीडमा हिँडिरहेको जमात, जहाँ त्यहीँ फूटबल अनि अबेर रातसम्म चलेको खेलको चर्चा सुन्न पाइन्छ । “के भो दाइ, आँखा त रातो रातो छ नि, बिरामी पर्नु भो कि क्या हो ?” भनेर चिया पिउँदै गर्दा एकजना चिया पसले दाइले गर्वका साथ भने, “फूटबल हेरेको थिएँ” । प्रश्न सोध्ने दाजुले पनि कुरा बुझेरनै त्यो खेलको विस्तृत छलफल सुरु गरे । हालत यो छ फूटबलको देशभर नैँ भनौँ ।
विश्वकप महासंग्रामको असर वा भनौँ त्यसको रौनक काठमाडौँ विश्वविद्यालयमा पनि राम्रोसँग नै छाएको देखिन्छ । केयूको मूलद्वारबाट छात्रावाससम्म जहिँतहीँ फूटबल नै फूटबल पाकिरहेको छ, अनि पकाइराखिएको छ । विश्वकप महासंग्रामका खेल दक्षिण अफ्रिकामा भैरहँदा यहाँ विश्वविद्यालय छात्रावासहरूमा कोही अर्जेन्टिनाको त कोही ब्राजिलको जर्सी लगाएर समर्थन गरिरहेका भेटिन्छन् । छात्रावासभित्रै रहेर पनि विद्यार्थीहरुले विश्वकपको भरपुर मनोरञ्जन लिन पाएका छन् । साथै पुरुष छात्रावास भित्रको सोसियल हलमा राखिएको प्रोजेक्टर अनि ठूलो साउन्ड बक्सका कारण भने यहाँ अर्कै रौनक देख्न पाइन्छ । खेल साँझमा होस् चाहे मध्यरातमा, फुर्सदको समय होस्, चाहे आन्तरिक परीक्षाको बेलामा नै, यहाँ खेलप्रेमी दर्शकको राम्रै भीड देखिन्छ । वा भनौँ दर्शकको कमी कहिल्यै भेटिँदैन ।
त्यसैगरी, छात्रावासमा फूटबलको रौनक छाइरहँदा फेसबुकमा भने खेल हेर्ने, नहेर्ने अनि बुझ्ने, नबुझ्ने जमातबीच कोलाहल देखिन्छ । कसैले आफ्नो प्रोफाईल फोटोमा मनपर्ने देशको जर्सीमा आफ्नो नाम अनि नम्बर राखेर पोष्ट गर्नेगरेको भेटिन्छ, भने कतै विश्वकपको गीतको बोललाई स्टेटसमा राखेको पाइन्छ । क्रिकेटमा जस्तै यहाँ फुटबलमा पनि खेल भइरहँदा, खेलको ताजा ताजा जानकारी स्टेटसमा राख्ने चलनलाई कतिले निरन्तरता दिइरहेका छन् भने कतिले स्टेटसमा नै कसले जित्ला भनेर भिडन्त गरिरहेका छन् । समग्रमा भन्नुपर्दा फेसबुक फुटबलमय भएको छ । पहिलेको तुलनामा यसपालीको फूटबल रौनकमा महिलाको सहभागिता पनि निकै धेरै देख्न सकिन्छ । पहिले खेलबाट टाढा भाग्नेहरू, यो पाली भने निकै नै जोसका साथ आ–आफ्नो मनपर्ने देशलाई सपोर्ट गरिरहेका छन् । केयू गल्र्स हस्टेलमा पनि फूटबलले रामै्र उपस्थिति पाएको छ ।
यसरी वरपर यतिको रमाइलो भैरहँदा फुटबलका बारे दुःख, वेदना पोख्नेको जमात भने अर्को तर्फ रहेको छ । “नेपालको जर्सी लगाएर मैले कहिले नेपाललाई विश्वकपमा सपोर्ट गर्नेहोला” भनेर छात्रावासमा बस्ने एक विद्यार्थीले आफ्नो दुखेसो पोखेका थिए एक दिनको फेसबुकको स्टेटसमा । भने हाम्रा देशका नेताहरुको आपसी झगडालाई पनि फूटबलको मैदानमा देखाउन पछि परेका छैनन् हाम्रा फेसबुकका मित्रहरु । के केटा, के केटी, सबैजनानै फूटबलको यो महान चाडमा रमाइरहेका बेला हस्टेलमा बसिरहेका ईलेक्ट्रिकल ईन्जिनियरिङ् प्रथम वर्षका अमर श्रेष्ठ भने हस्टेलमा त्यो मात्रामा क्रेज नरहेको उल्लेख गर्दैथिए । त्यस्तै खेलका दौरान बजाउने भूभूजेलाको आवाजले पनि धेरै नै डिस्टर्व गरेकाले खेल हेर्दा निद्रा लाग्ने पनि उनको दुखेसो रहेको छ ।
चाहे जे होस्, चार वर्षमा आउने यो महाउत्सवमा सबैले रमाउने मौका पाएका छन् । तर नजिकिँदै गरेको सेमेस्टरको परीक्षा अनि फूटबलको असली रोमाञ्चक मोड, त्यो हो फाइनलको मुठभेड, दुबैले दोधारमा पारेको छ केयूका विद्यार्थीलाई । तर जे भएपनि खेल अनि यसको मजा सबैले लिनै पर्छ । तर हामीले यो पनि विर्सनु हुँदैन कि हामी फुटबल हेर्न भन्दा पनि पढ्न आएका हौँ । त्यसैले त्यो कुरालाई मनन गर्दै अनि फुटबलको मोहलाई यथावत राखी महाउत्सवलाई विदाइ गरेमा सबैलाई अर्को चार वर्षमा हुने यो महासंग्रामको प्रतीक्षा मनबाट हुने थियो ।